X
تبلیغات
الوار نیوز - مطالب خواندنی


                    




برچسب‌ها: عکس در مورد عید نوروز
نوشته شده توسط محمدرضا شوکتی الوار علیا در جمعه یکم فروردین 1393 ساعت 15:28 | لینک ثابت |

bayram galir

محمدرضاشوکتی

بايرام ايدي گئجه قوشو اوخوردو

آداخلي قيز به‌ي جورابين توخوردو

هر كس شالين بير باجادان سوخوردو

آي نه گؤزه‌ل قايدادي شال ساللاماق

بَه‌ي شالينا بايرامليغين باغلاماق

قيش چيخدي، اوزو قاراليق كؤموره قالدي. بيرده بيز قالديق، بير قالاق آرزي ديلك. بير دونيا حسرت. بير بؤلوك اوره‌ك، و...

ياز گلير، بايرام گير آتا بابالاريميزين يادگاري «نوروز بايرامي» قيشين ايستي اوجاقلاريندان چيخيب، اهريمنين الينده‌ن قورتولوب «قيز قالاسي»، «قيزكؤرپوسو»ند‌ه‌ن كئچيب،

«آتيل باتيل چرشنبه          باختيم آچيل چرشنبه»

دئيه آينا كيمي آيدين گونلر آرزيلاييب، ساياچيلارين سايالاري و عاشيقلارين سازلاري ايله ال بير اولوب، كند – كؤوشنه ساري يولا دوشور.

نوروز گلير، دونيا تزه‌لنير، طبيعت يئني‌لشير، امّا بيز نئجه؟! تزه‌ليكده‌ن، يئني لشمكده‌ن، دوزلوك ده‌ن دوغرولوقدان بيزيم‌ده خبريميز وارمي؟ بيزده آغ بيرچك آنالارين صداقتلي اوره‌يي كيمي صاف بير اوره‌يه صاحاب اولموشوق؟ يوخسا...! نه يه؟!         

نوروز گلير، دونيا ميزا نئجه باخميشيق. بوراجاخ نه ائتميشيك؟!گله‌جك نسله‌نه تؤحفه ميز واردير؟ نئچه سرمايا...! نه جوره‌طبيعت! نه دوشونجه؟...نوروز گلير... هارداييق، كيميك، ...!؟

بو ايلي ده سونا يئتيرديك، بايرامليق اولسون دئيه نئچه سطير  اوره‌ك سؤزو ايله نئچه بيت شعر يازيب تقديم ائده‌ك، اومود كي يئني ايلينيز آيدين، بوللوق، بركتلي، موبارك، گوللو- چيچكلي اولسون.

بو ايليميزي جور به جور سياسي، اقتصادي هنري اولايلارلا سونا وئرديك. آجي – شيرين خاطيره‌لرله آز – چوخ ياناشديق، امّا هئچ بيريسي دونیاسوییه سینده اوز وئره ن قانلي فاجعه‌لرده‌ن آجي اولمادي. بيز باهاليغا، تحريمه، ابرقدرتلرين ظولمونه دؤزدوك،قيشي كؤمورون اؤزو قاراليق قيمتينه قورتارديق، امّا قانلی فاجعه لرده آیاق آلتیندا قالان خيرداجا اوشاقلارين آغلار گؤزلرينین دردلی باخیشلارینا دؤزه بيلمه‌ديك. اونلارلا بيرگه آغلاديق، اونلارا ده‌ين يارا ائله بيلديك بيزه ده‌يدي. بيزده اينسانيق، بيزيمده قلبيميز وار.

 رحمتليك سعدي دئيير:

 

بني آدم اعضاي يكديگرند

كه در آفرينش ز يك گوهرند

چو عضوي به درد آورد روزگار

دگر عضوها را نماند قرار

تو كز محنت ديگران بي غمي

نشايد كه نامت نهند آدمي

بيز جنگ يوخ، صولح، باريشيق، عشق، محبت عاشيقي ييك. بيزيم علم، هنر و صنعتيميز صولح‌له باريشيق نامينه دير. بيزيمچيراغيميز تانريدان ياينر. هئچ كيمسه اونو سؤندوره بيلمز.

 

میللت یولودور حاق یولو دور گئتدیییمیز یول

ای حاق یاشا ای سئوگیلی میللت یاشا وار اول

رحمتليك واحيد بويورور:

اي گول مني سن ايسته‌سن عؤمروم هدر اولماز

صولح اولماسا ائولاد وطن بخته‌ور اولماز

آزاده‌ليگي صولحو سئوه‌رلر بيزيم ائللر

بير يئرده كي صولح اولسا او يئرده ضرر اولماز

ساغ اولون ساغليقلا قالين.یئنی ایل بایرامینیز موبارک اولسون

آرتيق حؤرمتله:

محمدرضا شوكتي الوارعلیا

 


برچسب‌ها: نوروز بایرامی, عیدنوروز
نوشته شده توسط محمدرضا شوکتی الوار علیا در پنجشنبه بیست و نهم اسفند 1392 ساعت 10:15 | لینک ثابت |


داش داش اوسته قالمازدی

 

دئییرلرکی، خوجا نصرالدین آنادان اولدوغو کند چوخ گؤزل ایمیش. چوخ گؤزل هاواسی،

جوربه‌جورسولاری، قشنگ باغلاری، باغچالاری وار ایمیش.

ایستی یای گونلری ‌نین بیرینده خوجا ائشیدیر کی، شهرین حاکیمی واخت کئچیرمک اوچون

هامان کنده گزمه ‌یه گئدیب. قالیر کندین قئیدینه کی، گؤره‌سن حاکیمین بو واخت کئچیرمه یی

کنده نَیه باشا گله‌جک؟

بیر هفته کئچیر. خوجا ائشیدیر کی، حاکیم قاییدیب گلیب. دوروب حاکیمین یانینا گئدیر.

باخیرکی، حاکیمین کئیفی چوخ سازدی. سلام-کلامدان سونرا خوجا حاکیمدن سوروشور:

- یاخشی، حاکیم آغا نئجه کئچدی؟ راضی قالدینمی؟

حاکیم دئییر:

- بیلیرسن نئجه یاخشی کئچدی... هئچ بیلمه ‌دیم کی، بیر هفته نئجه گلدی، نئجه کئچدی؟

- بیرده باخدیم کی، قورتاریب. باخ، بیرینجی گون کندده بؤیوک بیر یانغین اولدو،

کندین تامام یاریسی یاندی. جاماعت ائله قیشقیریب قاچیردی کی، آدامین گولمکدن قارنی

جیریلیردی حتی بیر نئچه آدام دا یاندی.ایکینجی گون بیر قودورموش ایت اون-اون بئش

نفره‌جن آدام قاپدی. اؤزون فیکیرلش گؤر نه قیامت اولار دا... لذّت وئردی.

صاباحیسی بیر سئل گلدی، بیر سئل گلدی، داها نه دئییم... تزه بیچیلمیش بوغدالار سویون

ایچینده اوزوردو، اونلارین دالینجا آداملار اؤزلری ده اوزوردولر. چوخلو آدام دا آپاردی.

دؤردونجو گون بیر کندلی دلی اولدو، بئش-آلتی آدام اؤلدوردو. بئشینجی گون بیر دام اوچدو،

 بوتون کولفت قالدی آلتیندا. اؤلن، قولو سینان، باشی ازیلن. آلتینجی گون بیر آرواد اؤزونو

 بوغوب اؤلدوردو... آخیر کی، دئمه یینن باشا گلن دئییل. باشقا جورکئیف چکدیک. من

عؤمرومده بئله کئیف گؤرمه ‌میشدیم.

خوجا حاکیمین سؤزلرینه قولاق آسیب دئییر:

- یاخشی کی، بیر هفته‌ یه گلیبسن. بیر آز دا قالسایدین کندده داش- داش اوستده قالمازدی.

 

خوجا نصرالدینین بوستانیندا

بیر آخشام اوستو خوجا اؤز بوستانیندا قووون دریرمیش. اۆچ نفر گلیب سلام وئریر.

خوجا سلامی آلدیقدان سونرا تئز بیر قووون کسیرکی:

- بویورون، قووون یئیین!

قوناقلار یئییب دویاندان سونرا دورورلارکی، گئتسینلر، خوجا دئییر:

- قووونلاردان سئچین، گؤتورون، اوشاقلارا دا آپارین!

ائله خوجا بونو دئجک قوناقلاردان ایکیسی هره‌سی ایکی قووون، اوچونجوسو ده اللشه –

اللشه اوچ قووون گؤتورور. خوجا تئز اۆچ قووون گؤتورن قوناغا تعظیم ائدیب دئییر:

- پادشاه ساغ اولسون! اؤز وزیر-وکیلینله منیم بوستانیما خوش گلمیسن!

قوناق حئیرتله سوروشور:

- سن نه ‌دن بیلدین کی، من پادشاهام، بونلار دا وزیر-وکیل؟

خوجا دئییر: موفته خورلوغونوزون درجه ‌‌سیندن بیلدیم.

 

هامینیزین دردینی چکیرم

 

شهرین حاکیمی خوجا نصر‌الدینه اؤزونون ان قورخولو دوشمنی کیمی باخارمیش.بوتون

فیکری ذکری بو ایمیش کی، بیر فورصت تاپیب خوجا یا پیسلیک ائله‌سین.اما هرنه حیله‌

قورارمیشسا،خوجا ایشین ایچیندن ائله مهارتله چیخارمیش کی،حاکیم اؤزو آخماق وضعیتده

قالارمیش. گونلرین بیرینده خوجانین ائششه یی اؤلور.حادثه‌ خوجایا او قدر تأثیرائله‌ییرکی،

کیشی عمللی-باشلی یاسا باتیر.نه دینیر، نه دانیشیر،ائله درد چکیر.شهرین حاکیمی مسئله ‌دن

خبردار اولور. هئچ اولمازسا خوجا یا ساتاشماق اوچون یاخشیجا فورصت دوشدویونه سئوینیر.

آدام گؤندریب خوجانی حضورونا چاغیرتدیریر.سلامدان سونرا یالاندان قاش-قاباغینی

ساللاییب دئییر:

- بو نه بدباختلیقدیرسنه اوز وئریب، آی خوجا!؟ دئییرلرجانیندان آرتیق ایسته ‌دیگین، اؤزونه

لاییق بیر ائششه ‌یین وارایمیش، اؤلوب... بس بیزیم کیمی دوستلارا نییه خبر وئرمه‌ میسن؟

خوجا باشا دوشورکی،حاکیم اونو تحقیرائله ‌مک مقصدیله چاغیریب. اؤزونو پوزمادان دئییر:

- سیز حاقلیسینیز، حاکیم آغا! من دوغرودان دا او ائششه یی چوخ ایسته‌ ییردیم.

او، منه هم ائششک ایدی، هم آت، هم ده سیزدن یاخشی اولماسین، گؤزل بیر دوست ایدی.

 یازیق ائله بیردن-بیره آزارلادی، عؤمرونو باغیشلادی سیزه.

حاکیم باخیر کی، خوجا یئنه ده اونو اوسته له ‌دی. یانینا چاغیرماغینا دا پئشمان اولور. بیرتهر

 باشدان ائله‌مک اوچون دئییر:

-چوخ فیکیرائت‌مه! دونیانین وفاسی بودور.هامیمیزاو یولون یولچوسویوق...نه ائتمک اولارکی؟

خوجا دئییر:

-اشی، سیز ساغ اولون! الله اونون عؤمروندن کسسین، جالاسین سیزین کیمی دوستلارین

عؤمرونه.او نئجه دئیرلر،تورپاغی سانی یاشایاسان. آنجاق من ده ائله تک بیرجه ائششه‌ یین

دردینی چکمیرم کی؟.. بیلیرم کی، سیزهامینیز او یولون یولچولاری سینیز،اودور کی، ائله

هامینیزین دردینی بیردن چکیرم.

 

 

ساققال ایختییاری

 

دئییرلر کی، هره‌نین بیر عادتی اولار. خوجانصرالدینین ده عادتی بو ایمیش کی، چوخ

تئز- تئز ساققالینی تومارلارمیش. تیمورلنگ اینجیتمک مقصدی ایله بیرگون اونا دئییر:

- ساققال تومارلاماغی سنه قاداغان ائله ‌ییرم. بیر ده تومارلاسان ساققالینی قیرخدیراجاغام،

الینی ده کسدیره‌جه ‌یم.

خوجا تیمورا یاخشی بلد ایمیش. بیلیرمیش کی، چوخ دا اونون ایپینین اوستونه اودون ییغماق

 اولماز. اودورکی، یازیق ساققالینی تومارلاماغی ترگیدیر.

بو احوالاتدان بیر مدت کئچیر. گونلرین بیرینده تئیمور خوجا دان سوروشور:

- خوجا، من نه ائله ‌ییم کی، اهالی منیم عدالتیمه اینانسین؟

خوجا دئییر:

- هرشئیدن قاباق، قیبله ‌ی-عالم، هر کیشی ‌نین ساققالی‌ نین ایختییارینی اؤزونه قایتار!

 

یالان اولاجاق

 

خوجا نصرالدین بیر گون یولدا ائششه ‌یینی ایتیریر، نه قدر آختاریرسا، تاپا بیلمیر.

آخیردا ال چکیب پییادا ائوه قاییدیر. بیر آز گلندن سونرا قونشوسو چیخیر قاباغینا.

خوجا قونشوسونو گؤرجک سوروشور: قونشو، کندده تزه نه وار، نه یوخ؟

قونشو دئییر: ائله تزه بیر شئی یوخدور. نئجه؟

خوجا سوروشور: بس کندده دانیشمیردیلار کی، خوجا نین ائششه یی ایتیب؟

قونشو دئییر: یوخ، ائشیتمه‌ میشم.

خوجا تئز شوکور ائله‌ییر کی: آللاها شوکور. دئیه ‌سن ائششه ‌یین ایتمه یی یالان اولاجاق.

 اگر دوغرودان ایتسئیدی، جاماعت دانیشاردی.


برچسب‌ها: گوناگون, ملانصرالدین, بهلول عاقل, بهلول دیوانه, پشه
نوشته شده توسط محمدرضا شوکتی الوار علیا در پنجشنبه ششم تیر 1392 ساعت 13:26 | لینک ثابت |


خوجا نصرالدین و جاوان

 

قیش آخشاملاریندان بیرینده خوجا محله ‌ده کی چایخانایا(قهوه خانه) گئدیر. فیکیر وئریب

گؤرورکی، دوکانین کونجونده بیر جاوان اوغلان اوتوروب، اما ائله ‌دی، ائله‌ دی کی،

ائله بیل غم دریاسینا باتیب.خوجا ماراقلانیب جاوانا یاخینلاشیر، بیر آز اوردان-بوردان

صؤحبت ائله ‌یند ن سونرا سوروشور:

- قارداش، دئ گؤروم، سنه نه درد اوز وئریب کی، بئله غم دریاسینا باتمیسان؟

جاوان بیر آه چکیب باشلاییر کی:

-آی خوجا ،سندن آییب اولسا دا، من فیلان تاجیرین قیزینا عاشق اولموشام.قیزدا منی سئویر.

ایکیمیز ده بیر-بیریمیزه سؤز وئریب عهد پیمان باغلامیشیق. او، دؤولتلی تاجیر قیزیدی،

اما من، نئجه کی گؤرورسن، یوخسول بیر اوغلانام. چوخ گؤتور- قوی ائله‌یندن سونرا

آخیری دونن گئتدیم تاجیرین یانینا کی، بس، قیزینی وئرمنه. تاجیربیر آلتدان یوخاری

منه باخیب دئدی:

- قیزیمی نه قدر سئودیگینی گرک ثبوت ائلییه ‌سن. او دا بئله اولار کی، گرک چایدا بوزو

سیندیریب گیره‌سن سویوق سویون ایچینه. تا سحره قدراورادا قالاسان. بونو ائله ‌سن اوندا

 قیزی سنه وئررم.

من محبتین گوجوندن "باش اوسته" دئییب اورادان چیخدیم. گؤزله ‌دیم قارانلیق دوشدو.گلدیم

چایین کنارینا. بوزو سیندیریب بوغازاجان گیردیم سویوق سویون ایچینه. قاریاغیردی،کولک

ویییلداییردی، بیرسویوق وار ایدی کی، دای نه دئییم. دوز صوبحه قدر قالدیم سویون ایچینده.

ائله کی،سحرآچیلدی، سودان چیخدیم، اوز قویدوم تاجیرین ائوینه. ایچری گیریب دئدیم:

"تاجیر، العهدو من الوفا. من شرطی یئرینه یئتیردیم، سن ده ودینه عمل ائیله".

تاجیر یئنه ده بیر آلتدان یوخاری منه باخیب دئدی:

- یالان دئییرسن. ثبوت ائله کی، سن دوغرودان دا سحره قدرسودا قالیبسان.

من آند-آمان ائله ‌ییب دئدیم:

- واللاه، بالله، قالمیشام. حتی او اوزاق کندلرین بیرینده بیر پنجره‌ده بیر شام دا یانیردی.

تاجیر گولوب دئدی:

- دئمک، شرطیمیز پوزولوب. سن گؤزونله ایشیغا باخیب قیزینیبسان.

من نه قدر ائله‌دیم کی، "آی جانیم، ایکی آغاجلیقدان دا شام ایشیغینا باخماقلا آدام قیزینا

 بیلرمی؟" - کار ائله‌مه‌ دی کی، ائله‌مه ‌دی. من ایشی حاکیمه وئردیم. بیلمیرم حاکیمله گئدیب

 نه چوغوللاشدی، نه چوغوللاشمادی، حاکیم ده اونون دئدیکلرینی تسدیق ائیله‌ییب منی

 چیخاردیب قوودو. ایندی ایشیم اولوب بئله آه-زار.

خوجا اولدن آخیرا کیمی دقتله قولاق آسیب جاوانا دئییر:

- صاباح آخشام منه قوناقسان. گلمه ‌میش اولما!

خوجا دوروب اورادان بیر باش تیمور لنگین حضورونا گئدیر. باش اییب دئییر:

- قیبله‌ی-عالم، صاباح آخشام منه قوناقسینیز.

اورادان گئدیب همن حاکیمی، همن تاجیری ده چاغیریر. بلی، صاباح اولور. تئیمور،حاکیم،

 تاجیر و باشقا دعوت اولونموشلار گلیرلر. خوجا بونلاری یاخشیجا قبول ائله‌ییر، اگلشدیریر،

اؤزو هارایا ایسه چیخیب گئدیر.

تیمور اطرافا گؤز گزدیریب گؤرورکی، نه اوجاق یانیر، نه قازان قایناییر. قالیر معطل کی،

بو نئجه قوناقلیقدیر... غرض، بیر-ایکی ساعت گؤزله ‌ییرلر،

خوجا گلمیر. آخیردا تیمور آروادی چاغیریب سوروشور:

- آی باجی، بس خوجا هارا گئتدی؟

آرواد دئییر: باغچانین دیبینده سیزین اوچون پلوو بیشیریر. تئیمور قوناقلاری دا گؤتوروب

 گئدیرباغچانین دیبینه. باخیرکی، خوجا اوجا بیر آغاجین باشیندان بیر پوتلوق قازان آسیب،

آغاجین دیبینده ده بیر شام یاندیریب، اوتوروب گؤزله ‌ییر. تیمور سوروشور:

- خوجا بو نه دیر؟ بورادا نه قاییریرسان؟

خوجا چوخ ساکیت دئییر:

- قیبله‌ی-عالم ساغ اولسون! سو آسمیشام، گؤزله‌ ییرم قایناسین، سیزین اوچون پلوو بیشیریم.

تئیمور حیرصله‌ نیب دئییر:

- آده، سن اؤزونو دولامیسان، یا بیزی؟ بورادان دا اورایا ایستی دیَیب سو قیزار؟

خوجا اوندان ده برک حیرصله ‌نیب دئییر:

- بس ایکی آغاجلیقدا یانان شاما باخماقلا دا بدن قیزار کی، سن اوحؤکمو چیخاریبسان؟

تیمورسوروشور: "بو نه مسئله ‌دیر؟". خوجا احوالاتی اونا دانیشیر، قیزی آلیب اوغلانا وئریر.

 


برچسب‌ها: ملانصرالدین
نوشته شده توسط محمدرضا شوکتی الوار علیا در چهارشنبه پانزدهم خرداد 1392 ساعت 1:5 | لینک ثابت |

قشنگ خوروز

 

بيري وار ايدي، بيري يوخ ايدي، کئچميش زامانلاردا ايکي اوزاق قوهوم وار ايدي. بونلارين بيري يوخسول ايدي کی مئشه‌ده، بالاجا بير داخمادا قالاردی. او، بيريسی دؤولتلي ايدي، شهرده، قشنگ، بؤيوک بير ائوده ياشاييردي.
گونلرين بير گونو يوخسول، مئشه ايله گئديردي، بيردن آغاجين آلتيندا پاريلدايان قيزيل بير له لک گؤردو. باشيني قالديريب يوخاري باخدي، گؤردو کي، آغاجدا قويروغو قيزيل بير خوروز اوتوروب. يوخسول قيزيل له له یی گؤتوروب بيرباش شهره، دؤولت‌لي قوهومونون يانينا گتيردي.دؤولت‌لي قيزيل له له ‌يه باخيب دئدي:
– گؤزل شئي ‌دير!آنجاق دگري چوخ آزدير.من سنه بو له لک اوچون بيرجه مانات گوموش پول وئررم.
يوخسول ايسه عؤمرونده قيزيل گؤرمه ميشدي، اونا گؤره ده بيلميردي کي، بو له لک خالص قيزيلدان‌دير. او ائله بيليردي کي بو نه ايسه قشنگ پاريلدايان بير شئي ‌دير. اونا گؤره ده او ائله بيلدي کي، اونون قيزيل له له یی اوچون گوموش پول ياخشي قيمتدير.
يوخسول کيشي او بيري گون يئنه ده مئشه ‌يه گئتدي، همين آغاجين آلتيندان يئنه ده قيزيل له لک تاپدي. اونو گؤتوروب دؤولتلي‌نين يانينا آپاردي، يئنه ده عوضينده گوموش پول آلدي. بير نئچه گون دالبادال بو احوالات بئله باش وئردي.
بير دفعه ده يوخسول هميشه کي کيمي آغاجين آلتينا گلدي، گؤردو کي، قيزيل قويروقلو خوروز برکدن بانلايير:
– کيم منيم اوره گيمي يئسه، او آدام هر گون باليشينين آلتيندان ايکي قيزيل يومورتا تاپا‌جاق! کيم منيم اوره گيمي يئسه، او هر گون باليشينين آلتيندان ايکي قيزيل يومورتا تاپا‌جاق!
يوخسول بو ايشه لاپ مات قالدي، تئز شهره قاچيب احوالاتي دؤولت‌لي و آجگؤز قوهومونا دانيشدي. او ايسه جاوابيندا دئدي:
– اگر سن او خوروزو منيم اوچون توتا بيلسن سنه اونون اوچون مين گوموش پول وئررم!
يوخسول اونونلا بئله شرط کسدي:
– سنين پولون منه لازيم دگيل! ياخشيسي بودور کي، منيم ايکي اوغلومو اؤز يانينا آپاريب اونلارا اؤز اوشاقلارين کيمي باخ. من ايسته ييرم کي، اونلار عاغیل‌لي و ساوادلي اولسون‌لار. دؤولتلي او ساعت سؤز وئردي کي، يوخسولون اوشاقلاريني يانينا آپارار و اونلاري اوخوماغا قويار. بونون عوضينده ده يوخسول کيشي دؤولتلي يه سؤز وئردي کي قيزيل قويروقلو خوروزو اونون اوچون توتسون. يوخسول سحر تئزدن مئشه‌يه، همين آغاجين آلتينا گلدي. قشنگ خوروز دينمه ‌دن يوخاريدان اونا باخيردي.
يوخسول نیشان آليب اوخلا قيزيل قويروقلو خوروزو ووردو. يوخسول کيشي خوروزو گؤتوروب اوغلانلارينا وئردي، اونلاري شهره، دؤولتلي قوهومونون يانينا گؤندردي.
دؤولتلي قيزيل قويروقلو خوروزو گؤروب سئوينجيندن آتيليب-دوشدو. او، اؤزو خوروزون قيزيل له لک ‌لريني بير-بير يولدو، سونرا اونو يوخسولون اوغلانلارينا وئردي کي، خوروزو بيشيريب ناهارا اونا وئرسينلر. او، اؤزلوگونده بئله قرارا گلميشدي کي، يوخسولون اوغلانلاريني درسه گؤندرمه ‌يه‌جک: قوي اونون يانيندا قاليب نؤکرچي ‌ليک ائله ‌سينلر!
اوغلانلار مطبخه کئچيب خوروزو بيشيرمه یه باشلاديلار. اونلار چاليشيرديلار کي، خورک دادلي اولسون، دؤولتلي قوهوملاري راضي قالسين. آنجاق بختلري گتيرمه ‌دي: خوروز بيشيب لاپ حاضر اولانا ياخين، اتين سويو بيردن قازاندا پيققاپيق قاينادي، خوروزون اوره یي سيچراييب بيرباش دؤشه مه‌نين اوستونه دوشدو!
– واي، بو نه بلا‌دير باشيميزا گلدي! – دئيه بؤيوک قارداش ديللندي. – ايندي گرک خوروزون اوره گيني توللاياق. بير باخ ها لاپ چيرکلي دؤشه مه‌نين اوستونه دوشوب. ايندي اونو گؤتوروب آغاميزا وئره بيلمريک... کيچيک قارداش ايسه يالواردي:
– خوروزون اوره گيني توللاما! من سحردن هئچ بير شئي يئمه ميشم. ياخشيسي بودورکي، گل اونو گؤتوروب يوياق، اؤزوموز يئيه ک.
قارداشلار بئله ده ائله ‌ديلر: خوروزون اوره گيني يويوب ايکي يئره بؤلدولر، هره بير پارچاسيني يئدي. سونرا دا بيشميش خوروزو دؤولتلي قوهوملارينين يانينا آپارديلار.
دؤولتلي او ساعت باشلادي بوشقابين ايچيني قورددالاماغا کي، خوروزون اوره گيني تاپسين. آختاردي، آختاردي، خوروزون هاميسيني يئدي، آنجاق اوره گي هئچ يئرده تاپمادي. اوندا دؤولتلي، اوزونو قارداشلارا توتوب سوروشدو:
– خوروزون اوره گي هاني؟ اونو نئيله ميسينيز؟
قارداشلار بو واخت احوالاتي اولدوغو کيمي اونا دانيشديلار.
تاماهکار دؤولتلي اونلارين اليندن ائله هيرسلندي کي، آغاجي گؤتوروب اونلارين ايکيسيني ده ائودن قوودو.
قارداشلار آغلايا-آغلايا مئشه‌ يه، اؤز يوخسول، بالاجا کوما‌لارينا قاييتديلار. اونلار هئچ باشا دوشه بيلميرديلر کي، بير خوروزون اوره گي نه دير کي، اونون اوستونده دؤولتلي بو قدر هيرسلنيب اونلاري ائويندن قوودو.
گئجه کئچدي، سحر قارداشلار هره‌سي اؤز باليشينين آلتيندان بير قيزيل يومورتا تاپدي. اونلار قيزيل يومورتا‌لاري دا گؤتوروب آتا‌لارينين يانينا گئتديلر و باشلارينا گلني اونا دانيشديلار.
آتاسي اونلارا دئدي:
– منيم او دؤولتلي قوهومومدان اوره گيم برک اينجيدي، سيزي ائويندن قوودوغو اوچون من بو پاريلدايان يومورتا‌لاري هر کس اولسا ساتارام، تکجه اونا يوخ.
ائله بو واخت ياخينليقدان گزرگي بير تاجر کئچيردي. يوخسول کيشي يومورتا‌لاري گؤتوروب اونون يانينا گئتدي. تاجر دئدي:
– آ، بو يومورتا‌لار کي، خالص قيزيلدير! من بو قيزيل يومورتا‌لارا گؤره سنه ياخشي پول وئررم.
تاجر بونو دئييب يوخسولون اتگينه او قدر پول تؤکدو کي، او، هئچ عؤمرونده بو قدر پول گؤرمه ميشدي.
يوخسول کيشي آنجاق ايندي باشا دوشدو کي، دؤولتلي قوهومو اونو هميشه آلداديرميش، – قيزيل له لک اوچون اونا گوموش پول وئريردي. “عيبي يوخدور! – دئيه يوخسول اؤز-اؤزونه دوشوندو. –
بيزلرده بير مثل وار دئيرلر کي، باشقاسيني آلدا‌دان اؤزو ده آلدانار. ائله بئله ده اولدو.
او گوندن بري قارداشلار هر گون اؤز باليشلارينين آلتيندان هره‌سي بير دنه قيزيل يومورتا تاپيرديلار. آتاسي بو قيزيل يومورتا‌لاري ياخشي قيمته ساتيردي. اونلار ايندي لاپ ياخشي دولانيرديلار. آنجاق ان باشليجاسي او ايدي کي، قارداشلار اؤز آرزولارينا چاتميشديلار: ايندي اونلارين ايکيسي ده علم اؤيرنيردي و خيلي شئي ده اؤيرنه بيلميشديلر.


(آسيا خالقلاري ‌نين ناغيل و افسانه‌ لري کيتابيندان)

 

 


برچسب‌ها: خروس, خروس زیبا, خروس قشنگ, حکایت جالبی در مورد خروس
نوشته شده توسط محمدرضا شوکتی الوار علیا در چهارشنبه پانزدهم خرداد 1392 ساعت 0:35 | لینک ثابت |

فهله


محمد رضا شوکتی


بار ایلاها چاره قیل، آی اون بئشینده ‌ن رد اولوب

سیلكه ‌نیب پولدان جیبیم، پولسوزلوغوم بی‌حدّ اولوب

یوخدو یول بازاره چون؛ یوللار بوتونلوك سدّ اولوب

            رحم قیل كاردیر قولاق، كوردور گؤزوم، لالدیر دیلیم

            یوخدو شانسیم ای خدا، ایلده ‌ن گلیبدیر پیس ایلیم

 

اهل –عیال زارو پریشان، آج – سوسوز،من نئیله ‌ییم

آه چكیرجیبلر تماماً سینه‌سوز، من نئیله ‌ییم

گؤزجوموبدور، دیل – دوداق باغلیبدی بوز، من نئیله ‌ییم

            آی بو باش فرهاد، او باش مجنونِ یارم ای خدا

            آی بوباش یاریم شیرین، لیلی اوباش منده‌ن جدا

 

كارگر گؤرموش پولون هرآیدا اون بئش گون اوزون

آی بوباش چیلتیك چالار،امّا اوباش بیلمز سؤزون

تلخ اولاراوقاتی چوخ – چوخ،دیك آچیب باخماز گؤزون

            جان دئسن دیك داشلانار، جانان دئسن غوغا سالار

            هوپ توت اوغلان،ساكیت اول،بیرسؤز دئسن دعواسالار

 

ایلده بیر یول قاوزانار آیلیق ولاكین نیرخلار

گونده بیریول قاوزاناركن، اوچ‌جه یوزیول آببیلار

فهله ‌نین باشیندا دولت؛ ای دریغا اود قالار

            ات – نوخود ارزیله؛ آیلیقلار ریال ایلن اولوب

            فهله ‌نین گول رنگی یارب گؤر نه نوع ایلن سولوب

 

ای وزیر، ائی سرور كار – كارگر، ای تاج سر

كارگر چون هر گون اولسون جومله روز كارگر

هرگون ائتسین دردلرین اظهارعمو؛ بی شوروشر

            ایلده بیر گون فایدا وئرمز دردین اظهار ائتمه‌ یه

            «شوكتی» دردلر فزوندور؛ وئر امان زار ائتمه ‌یه

 

---------------------------------------------------------------------------------

 

بیلیجی قاضی

 

یازار : احمد

اؤتن ايللرده چين ولايت لرينين بيرينده بير قاضي وارايميش. اونون شهرتي نه اينكي اولدوغو بؤلگه ده، بلكه باشقا ماحاللارادا گئديب، چاتميشدير. ايستر زنگين اولسون، ايستريوخسول و ايسترسه بيليجي و خالق كوتله سي اولسون، اونون ميزان تره زيسين و حق – عدالتلي اولدوغونا اينانيرديلار.هامي اونو به يه نيب، اولدوقجا سئويرديلر،آنجاق، پيس عمللي لر وايري –اويورو آداملار بونو سئوميرديلر.

گونلرين بيرينده قاضي بیريولدان کئچرکن، بيردن – بيره يانيقلي اوشاق آغلاماسيني دويدو.

قاضي دايانمادان آتيندان دوشوب، اوشاغا ياخينلاشيب، اوندان سوروشدو:

- اوغلون نه اوچون آغلاييرسان؟

اوشاق آتدان يوخاري قاضيني سوزوب، سونرا باشينا گلن ماجراني اونا سؤيله دي:

- عمي بيليرسيز، من آتامي ايتيريب، آناملا ياشاييرام. هرگون آنام تنديرده فطير بيشيريب، من اونلاري ساتيب، خرجيميزي چيخاريرام. قاباقكيلار كيمي بوگون تئزدن دوروب، فطيرلري ساتديم. پوللاري توپلاييب، ائوه قاييداندا، گؤردوم يورولموشام، باشيمي آتيب، ائله بورادا ياتديم. آييليب، گؤردوم له له وار، يوردو يوخ، بير نامرد گليب، بوتون پوللاريمي، اوغورلاييب آپاريب.

قاضي دئدی:

- بونون بير بئله ناراحات ليغي يوخدور كي، اوغلوم.

اوشاق جاواب وئردي:

- عمي بيليرسيز، بوگون پولوموز يوخدور شام آلماغا.

قاضي بير آز فيكيره گئده ندن سونرا سوروشدو:

- اوغلوم دئ گؤروم، بو همان داشدي كي، سبدی پولو ايله بورايا قويموشدون؟

اوشاق اوتقونا – اوتقونا دئدي:

- بلي عمي، ائله بو داشين اوستونده ايدي.

قاضي يانينداكيلارا دئدي:

- بو داشي گؤتورون و منيمله گتيرين. سحر من بو داشي اوغرولوغو اوچون محكمه ائده جه يم.

سحريسي گون هامي شهرين مركزينه توپلاندي. خلق، ديلسيز – آغيزسيز بير داشين نئجه محاكمه اولوناجاغين گؤزله ييردي.

بلي، محكمه قورولدو، قاضي ايسه قضاوت يئرينده ايلشدي. قاضي اوشاقدان بيرده سوروشدو:

- اوغلوم، دئ گؤروم، بو داش همان داشدي كي سنين پولون بو داشين اوستونده اوغورلانيب؟

اوشاق قطعيتله جاواب وئردي:

- بلي آقاي قاضي.

قاضي اوجا سسله مأمورلارا امر ائتدي بو عمله گؤره داشا 50 ضربه شاللاق وورسونلار. اونلار داشي وورار – وورماز جاماعتين آراسيندان يوكسلن گولوش دولو سسلر هاميني حيرتلنديردي.

قاضي جاماعاتي ساكت ليگه دعوت ائتدي و دئدي:

- سيزين گولوشونوز، محكمه يه بيرنوع سايقي سيزليقدير.هامينيزي بيرنئچه پارا (پول) ايله محكمه ائديرم.

قاضي امرائله دي، سو ايله بير قازان گلدي، اونو گولن آداملارين قاباغينا قويدوكي، پولو قابا سالسينلار. هامي قاضي نين امرينه بويون ايمه لي اولدو.

قاضي اللري قوينوندا، بوصحنه ني تاماشا ائليردي. هامي پول ساليب قورتاراندا، قاضي مأمورلارا امر ائتدي سونونجو آدامي توتسونلار. قاضي دئييردي:

- اونو توتون، اوشاغين پولونو چالان آدام بودور.

مأمورلار او آدامي توتوب، جيب لريني آختارماغا باشلاديلار. بئله ليله اوشاغين پوللاريني اوندان آلديلار.جاماعات قاضييه دئدي:

- هاردان بيلدين كي، پولو اوغورلايان بو آدامدي؟

قاضي دئدي:

- سو تر– تميز ايدي، هر كس پوللاريني اونا آتاندا، تميزليي قاليردي. آمما بو آدام پوللاري قازانا آتان كيمي سو بولاندي. بللي اولدو بو آدام داشين اوستونده اولان پوللاري ، توز– تورپاقلي گؤتورموش. بئله ليكله اصيل اوغرو تاپيلدي.

- جاماعات ايسه اؤز پوللاريني سودان گؤتوردو.

چاپ اولماميش ناغيللار

بهروز ايماني – اكبر رحيم زاد فرجي

 

 -------------------------------------------------------------------------------

بیر نامه يازیم، باد صبا ياره يئتیرسین،

 

حئیران خانیم

اون دوققوزونجو عصرین اوللرینده ياشامیش (1790-1860) گؤرکملی

آذربایجان شاعرلریندن بیری ده حئیران خانیمدیر. شاعره‌نین آذربایجان و

فارس دیللرینده اولان 4500 بئيتلیک دیوانی اونون حیاتی حاقیندا معين

حقیقتلری اؤيرنمکده کؤمک ائدیر.

حئیران خانیم فضولی ادبی مکتبی‌نین مهارتلی داوامچیلارینداندیر.

او، عروض وزنی‌نین موختلیف اويناق بحرلریندن ایستیفاده ائتمیش،

هئجا وزنینه ياخین بحرلرده بیر سیرا شعرلر يازمیشدیر.


 

غزل

بیر نامه يازیم، باد صبا ياره يئتیرسین،

شرح غمیمی اول بت خونخواره يئتیرسین.

هیجران الیمی سالدی آياقدان من زاری،

داروي وصالین منه بیر چاره يئتیرسین.

صبریم کسیلیب، يار منیم جانیمی آلسین،

يا شاد ائله ‌سین وصل ایله، دیداره يئتیرسین.

دونياده و عقباده گؤروم مطلبه يئتسین،

هر کس منی اول يار وفاداره يئتیرسین.

بیر يول وئرین، اي محنت هیجران کی، پيامیم،

تا باد صبا اول گولو گولزاره يئتیرسین.

يوز حسرت ایله بو دیل هیجرانه گیریفتار

عزم ائتدی اؤزون اول گول بیخاره يئتیرسین.

يوز گئيش ایله سد ره اولوب خارسیتمکار،

قويمادی اؤزون اول گوله بیچاره يئتیرسین.

گل، تانری اوچون بونجا سیتم ائيله‌ مه ایظهار،

قوي، ياره اؤزون بو دیل آواره يئتیرسین.

بی ‌کس لیگیمه رحم ائله ‌سین خالیق بیچون،

(حئیرانی) او شهبازه دگر باره يئتیرسین.

 

------------------------------------------------------------------------------------------------------------

 

ایشیق



محمد رضا شوکتی


سحر آچدیقدا آنام،

گئجه نین زیل قاراسین،

ائویمیزده ن سوپورور

گونشین آخار نورون

او گؤزل اللر ایله ،

گؤتورور،هئی گؤتورور

بیلیرم پنجره میز ،

زامان اؤتدوکجه ،

 قارانلیقلارا

حسرت قالاجاق!


---------------------------------------------------------------

آنام


میر مهدی اعتماد

 

نقل ائده رلر کی منی دوغدو آنام

دئدی : به به نه گؤزه لدیر بو بالام

دولانیب باشیما پروانه کیمی

چکیب آغوشونا ، دردانه کیمی

سود ایله قووه وئریبدیر اتیمه

دؤزوب ایللر بویو چوخ زحمتیمه

دئییب آهنگله لای- لای سؤزونو

یومماییب چوخ گئجه اصلا گؤزونو

آغلایان واختدا چکیبدیر یانینا

سؤیله ییب آغلاما قوربان جانینا

اؤیره دیب حؤرمت ایله یولداشینا

مهربان اول باجینا ، قارداشینا

 

---------------------------------------------------------------------

 بیر آز گولک


ایمانلی وزیر


بیر نفر پیغمبرلیک ادّعاسی ائله دی، اونو «معتصم»ین یانینا گتیردیلر. معتصم دئدی: پیغمبرلیک اوچون معجز‏ن نه دیر؟دئدی: بیر ایتی شمشیر منه وئرین!معتصم فرمان وئردی کی مخصوص اؤز شمشیرین اونا وئرسینلر.مدعی دئدی: یا خلیفه! سیزین حضورونوزدا من وزیرین باشین کسیب، سونرا یئنی‏دن دیریلده رم!معتصم دئدی: گؤزل معجزه‏ دیر، سونرا وزیره طرف اوز توتوب دئدی: بو ایشه سن نه دئییرسن؟وزیر کی جانین خطرده گؤروردو دئدی: قوربان! من اوندان معجزه گؤرمه ‏د‏ن اورکدن ایمان گتیرمیشم

نه ایش گؤروم!؟

بیر کاندیدا کی مجلیس نوماینده ‏سی اولماق ایسته‏ ییردی، خبرنیگار ایله مصاحبه ائدیردی. خبر نیگار سوروشدو: اگر مجلیسه انتخاب اولدون نه ایشلر گؤره ‏جکسن؟کاندیدا دئدی: من بو قیسمتدن نیگران دئییلم، بلکه منه اؤنملی اولان بودور کی اگر بو سئچگی ده انتخاب اولمادیم نه ایش گؤروم؟

 ------------------------------------------------------------------------------

قهرمان قادینلار ادبیاتیمیزدا


ذوالفقار کمالی

 

اینسان مدنیت حیاتیندا اوز وئره ن «تاپینتی» نین او اینسان توپلوسوندا اجتماعی حیاتین اساس خاصیتلری اوزره نه تهر آچیقلاماسی ، بیان ائدیلمه سی و عملده ایشه آپاریلماسی او توپلومسال جامعه نین تفکور و یاشاییش طرزینی نمایش ائتدیریر . او جامعه نین فاناتیزم ، اویدورما و خورافاتا اوغراماسینی و یا عکسینه اولاراق واقعی سوسیال مدنی دوشونجه لری نین هانسی سوویه ده اولدوقلارینی آیدینجاسینا بللندیریر.
میثال اوچون تورک ادبیاتیندا ان قدیم، قهرمان بیر قیزین، تک جانینا آغیر دوشمان قوشونو ایله ووروشماسی، مغلوب اولان تورک طایفاسینین غالیب گلن دوشمان طایفاسینین قوشونلاریندان انتیقام آلماغینین ناغیلی اؤز زامانی نین شاعیرلرینی جوشدوروب اونون قهرمانلیقلاری – قورخو بیلمز جسارتلی حرکتلری عین زاماندا مغلوب و مظلوم طایفاسینا یئنی ده ن روحیه وئریب باسقین ائده ن دوشمن علئیهینه سفربر ائتمه سی ، گیزلین تشکیلاتلار تشکیل وئرمه سی و نهایت قهرمان ایگیدلری دوشمانا قارشی موباریزه یه چاغیریب و دوشمانا غلبه چالماسی اگر باشقا خالقلار اؤرنک کیمی بو منظومه ده ن قیدالانیب مختلیف عنوانلارلا بونا تای بنزه تمه ، کیملیگینه اینانان قهرمان اوغول – قیز داستانلاری یاراتسالاردا آنجاق تورک ادبیاتیندا کؤکو اولان اینسان برابر لییینی بیر داها اثبات ائدیر ، کی بو گون بین الخالق سوییه ده اینسان برابر لیک حوقوقونون ان اساس سوتونو کیمی حئساب اولان کیشی و آرواد حاقلارینین برابر لیگی دیر .
قادینلارین کیشی لرایله حیاتین بوتون ساحه لرینده برابر ایشتیراکی ، موباریزه حیطه سینده ان قدیم زامانلاردان بو گونه قده ر « قهرمان قادین» کیمی ادبیاتیمیزدا اولدوز کیمی پارلاییرلار .
تومروس ، هجر، نیگارخانیم، زینب پاشا، شاهسئوه ن قیزی سرییه، و...یوزلرجه قهرمانلارین آدلارینی چکمک اولار


-----------------------------------------------------------------------

ایستَر

 

سس سیز

 

 

کؤنلوم سنی ای گول گئجه گوندوز سحر ایستر

احوالینی هر آندا اؤزومدن بَتَر ایستر

یوخدور سنه تای سئوگیلی جانان بو جاهاندا

سئومکله ووروللام جانیم الدن گئدر ایستر

من عشق ایله، آسوده لیگی وئرمیشم الدن

سن بیلمه دین عشق عالمی سندن نه لر ایستر

سن سن منیم عالمده اینان سئوگی پناهیم

کؤنلوم قوزو تک مهرینی هر آن مه لر ایستر

یاندیم و کول اولدوم سنین عشقینده من هر آن

گؤز یولداکی یار جانیمی بیردن گه لر ایستر

غم سؤیله مه غمدن دئمه گه ل (سَس سیز)ه رحم ائت

بیر گؤر بو یازیق کؤنلو پریشان نه لر ایستر 

 

 

نوشته شده توسط محمدرضا شوکتی الوار علیا در سه شنبه دهم اردیبهشت 1392 ساعت 0:41 | لینک ثابت |

آپاردی سئل لر سارانی

آرپا چايي آشدي داشدي

 سئل ساراني گؤتدو قاشدی

 آلاگؤزلو، قلم قاشلي.

 آپاردي سئل لر سارامي

 بير آلا گؤزلو بالامي .

 

یوز آتلی یدیق چیخدیق دوزه

پیچاق باتسین یامان گؤزه

ساری باشماق سودا اوزه.

آپاردي سئل لر سارامي

 بير آلا گؤزلو بالامي .

 

قالدی بو سینه مده داغین،

اؤلدوردو منی فراغین،

اؤلدو قارا توی اوتاغین.

آپاردي سئل لر سارامي

 بير آلا گؤزلو بالامي .

 

دوگونو تؤکدوم قازانا،

قاینادی قالدی آذانا،

علاج یوخ آللاه یازانا،

آپاردي سئل لر سارامي

 بير آلا گؤزلو بالامي .

 

 آرپا چايي درين اولماز،

 آخار سولار سرين اولماز

 سارا كيمي گلين اولماز.

 آپاردي سئل لر سارامي،

 بير آلا گؤزلو بالامي.

 

آرپا چایی منی آلدی،

آپاردی دریایا سالدی،

جیلو داریم دالدا قالدی.

آپاردی سئل لر سارامی،

بیر آلا گؤزلو بالامی.

 

آرپا چایی آدا گلیر،

کورایگیدلر دادا گلیر،

ساری باشماق سودا گلیر.

آپاردي سئل لر سارامي،

 بير آلا گؤزلو بالامي .

 

دؤگونو تؤکدوم طاباقا،

ایسلاندی قالدی صاباحا،

جیلودار دوشسون قاباغا،

آپاردي سئل لر سارامي،

 بير آلا گؤزلو بالامي .

 

من بو باغا گیرمه میشم،

قونچه گولون درمه میشم،

من سارانی گؤرمه میشم.

آپاردي سئل لر سارامي،

 بير آلا گؤزلو بالامي .

 

اولدوق عجب گونو قارا،

دردیمیزه یوخدو چارا،

سارا حسرت قالدی یارا.

آپاردي سئل لر سارامي،

 بير آلا گؤزلو بالامي .

 

قارا آغاج کؤکون قیریلسین

دیبینه بالتا ویریلسین.

جیلودار الین قوروسون.

آپاردي سئل لر سارامي،

 بير آلا گؤزلو بالامي .

 

 گئدين دئيين خان چوبانا،

 گلمه سين بو ايل موغانا ،

 موغان باتيب ناحاق قانا.

 آپاردي سئل لر سارامي

 بير آلا گؤزلو بالامی 

نوشته شده توسط محمدرضا شوکتی الوار علیا در چهارشنبه چهارم اردیبهشت 1392 ساعت 23:31 | لینک ثابت |
 

شرح فراق


رحمتلیک میر هدایت برهمند


آغلاماق قویموری تا نظمه چکم ناله لری

دولدورام حسرتیلن غصه یه پیمانه لری

دوستلارا درد دیلی دفتر عشقیمده یازام

آغلادام شرح فراقیم ایله بیگانه لری

یانام عشقین اودونا یئل داغیدا کوللریمی

بو آلیشماقدا سالام حیرته پروانه لری

اوز قویام کوه و بیابانه پریشان و ملول

قویمایام فخر ائده مجنون کیمی دیوانه لری

گئجه نی صوبحه کیمی فیکر و خیال ایله خوشام

منی مجذوب ائله ییب نرگس مستانه لری

گله گر بیر گون اولام مست لب لعل نگار

اوندا ترک ائله یه ره م مکتب میخانه لری

آتش عشقه یانان دهرده بیر من ده ییلم

عشق دیوانه ائدیبدیر نئچه فرزانه لری

نه اولار آی دوشه بیر لحظه بیزیم کلبه میزه

آزالار شأنی مگر شه گزه ویرانه لری

قویولوب خال لبین تا منه بیر طعمه اولا

منده بیر قوش کیمی هر آن ییغارام دانه لری

قوی گؤزه للر آدینا ثبت اولونا جور و جفا

من او شاعیر کی یازا شوریله افسانه لری

ناز ایله قلب «برهمندی» گؤزه ل چکدین اودا

هانسی صیاد پوزار ظولم ایله کاشانه لری

5/6/74

نوشته شده توسط محمدرضا شوکتی الوار علیا در چهارشنبه چهارم اردیبهشت 1392 ساعت 23:29 | لینک ثابت |

کوچه لر


ارغوان


گئجه لر گیزلی کؤنول! آغلا سولانسین کوچه لر

گؤز یاشیمدان دوغولان آه لا، بولانسین کوچه لر

آتدیم آهنگی، خیال ماهنیسی، حسرت ایزینه

دولاشان دم، یوخودان سسله اویانسین کوچه لر

ساریشان خاطیره لر قلبه یانار اود قالاییب

قورخورام جان اودونا من کیمی یانسین کوچه لر

هؤرولن داشلار آهیمدان دیله گلدیکجه یقین

اذن وئرمز اوره ییم سانکی جالانسین کوچه لر

قورخورام عشقیمی ایثبات ائله یم سئوگیلیمه

کیرپیگیمده ن سوزولن قانه بویانسین کوچه لر

ای منیم کؤنلومو تالان ائده ن، آنجاق بو گئجه

«ارغوان» کؤنلو کیمی قویما تالانسین کوچه لر.

نوشته شده توسط محمدرضا شوکتی الوار علیا در چهارشنبه چهارم اردیبهشت 1392 ساعت 23:26 | لینک ثابت |

دلي باليق

 حسن اوموداوغلو

 

اوزانيب دنيزين ماوي ياخاسين،

ييرتيب پارچالادي تيلوولو اللر.

ساليب توزاغينا بير نئچه باليق،

دنيزي ترك ائتدي، او لوولو اللر.

 

دنيز هاراي چكدي باليقلار اوچون

دالغالي ساچيني يولدو آنا تك

بير آزدان باغيرتي چكيب آغلادي

آنا آرخاسينجا باخان بالا تك

 

دنيز هارايينا چاتمادي بير هوو

سانكي قورد يئميشدي شنگيلي‌سيني

تپه گؤز اللري قان-قان دئيه‌رك،

آپارميشدي اونون سوگيلي‌سيني.

 

سئوگيلي باليقلار چاليشدي مدام،

قورتولوش اولمادي قورشون قييناقدان.

دوستاق باليقلارين پوزغون حالينا،

گؤيلر قان آغلادي قيزيل شافاقدان

 

شن سولار باغريندا چاخناشان باليق

آيريلدي قوينوندان بوللور دنيزين

فلك‌له يئسيرليك ال- بير اولاراق

سارالتدي باليغين گوموش بنيزين

 

بير نئچه قارا گون اؤتوب كئچدي ده

ساتاغا يوللاندي دوستاق باليقلار

آلينيب ساتيلدي سانكي بير ماتاح

دنيزين گؤزوندن اوزاق باليقلار

 

شوشه قفس‌لري سوسله مك اوچون

مرمر سارايلارا گئتدي باليقلار

كيميسي ال اوزوب آنا دنيزدن،

كيمسي-اؤزوندن،‌ايتدي باليقلار.

 

لاكين شيمشك باليق دايانماياراق

دنيز هوسينده آليشدي آنجاق

باليقلار دنيزه گره‌كدير دئيه

شوشه قفسينده چاليشدي آنجاق

 

او، دنيز ائولادي- دلي باليق‌دير،

دئييلدير بير قارین يئمك باليغي

مگر سيغينارمي شوشه قفسه

ايپك دنيزلرين شيشمك باليغي

 

باليغا ديكيلن سويوق باخيشلار

آل-الوان رنيگنه آلقيش دئييردي

باليق‌سا ايكي اوزلو شوشه‌لره،

اوره‌كده ابدي قارقيش دئييردي

 

باخيردي آينالي، قورخونج گؤزلره،

كيپريك‌لر بارماقليق، ‌ببك‌لر زندان

گؤرركن شكليني قارا گوزگوده

چيرپينيب قورتولوش ايستردي هر آن

 

چيرپينان باليغين گوموش گؤوده‌سين

بيچيب يارالادي شوشه قفسي

قانلي بير گرده‌يه دؤنموشدو يئري،

چيرپينيب چاغلادي واركن نفسي

 

دئدي: قوي بويانسين قانيما سولار

اوره‌كده قالماسين آرزيم، هاراييم

چايلارين قوينوندا دنيزه قدر

چاتاجاقدير منيم حريّت هاييم

 

بو گون من اؤلسم ده ياشاسين دنيز

قان-قيرميز اؤلومو آلقيشلاييرام

ذلّتله ياشاماق نه‌يه گره‌كدير

بئله بير حياتي قارقيشلاييرام

 

چاليشيب حريّت، ديلك يولوندا

دنيز سئوگي‌سيله قان وئردي باليق

خالي‌نين آل-قيرميز بير بوداغيندا

سانكي ناخيش اولوب جان وئردي باليق

 

او قوزقون باخيشلي قورغوشون اللر

ايلغيم كؤلگه‌سيني باليغا سالدي

باليغي آتاركن آرخين سويونا

سولار ائولاديني قوينونا آلدي

 

موشتولوق وئرمه‌يه اوچدو قاغايي

«گؤز آيدينلیغینا» گليردي آغلار.

«باشین ساغ»...دئمه‌يه چايلار تله‌سير

قارا كؤينه‌ييني گئيميشدي داغلار

 

يوللار اوزانيردي شيرين يوخو تك

آنجاق دايانمادي هفته‌لر،‌آيلار،

گتيريب چيخارتدي آنا دنيزه،

دالغا تابوتوندا باليغي چايلار.

 

باسيب اؤز باغرينا يورغون بالاسين

هؤنكوروب چاغلاييب، آغلادي دنيز

بولودلو گويلري درده گتيريب

يانيقلي اوره‌يين داغلادي دنيز

 

گؤيلر سه پوسكوروب وولقانلار كيمي

بولودلار، شيمشك‌لر، گورشاد چاغلادي،

بو گئجه صبحه تك ياغيش يئرينه،

گويلر دنيز اوچون باليق آغلادي.

 

نوشته شده توسط محمدرضا شوکتی الوار علیا در چهارشنبه چهارم اردیبهشت 1392 ساعت 23:18 | لینک ثابت |

 

آللاه گلن گؤنلریزی خیر ائله سین

 

یازاری: محمدرضاشوکتی الوار

 

یارب همیشه لوطفونو ائت رهنما منه

گؤسترمه اول طریقی کی یئتمز سنا منه

قطع ائیله آشنالیغیم اوندان کی غیر دیر

آنجاق اؤز آشنالرین ائت آشنا منه

                                      (فضولی)

 

یئنه بیر ایل عؤمروموزدن سوووشدو. یئنه ده بیر ایل بؤیودوک. یئنه

آجیلی- شیرینلی ، یئنیش – یوخوشلو بیرایل گلدی ده ، گئتدی ده . هره

بیرجور،هره بیرسایاقدا، اما مین بیر فیکیرله بو ایلی باشا چاتدیردی.

یازی یایا چاتدیرینجا دئدی: اولسون،یامان گونون عؤمرو آزاولار.

یایی  پاییزا چاتدیرینجا دئدی: اؤلمز خدیجه ، گؤرر نوه نتیجه. پاییزی

قیشا چاتدیرینجا دئدی:چؤره یی صاباحین نیرخینا یئدیک. قیشی دا

یئنی بیریازاچاتدیرینجادئدی:اولسون،قیش گئده ر،اوزوقارالیق کؤموره

قالار.هه دوسلار! کئچن اوروجلوقدا تویوغو سگگیزمین نئجه یه

یئدیک. البته اوراحاتلیقدادا یوخ ها!

نئچه ساعات صفده نؤبه چکندن سونرا. اوروجلوق چیخا- چیخمایا

اؤزون اوجوزلاتدی ،یومورتاسین باهالاتدی. یوخ ! ائله بیل تویوق   

آند ایچیب اتین اوجوزساتماییب، اوراحاتلیقدادا دویونون اوستونده

آلچی دورماسین. دویوده آند ایچیب کار- کاسیبین سوفره سینه ساری

باخماسین.هله ات، لپه، نخود،لوبیه وساییره یئریئمه لیلرقالسین

 قیراخدا.خیلاصه آلچاق- اوجالی بیر ایل سوودوق. اما تاری

یارانه نی باشیزدان تؤکسون دئیه کیلوسو فیلان قدیره چیخان پوسته

بادامین اوزونه حسرت قالمایاسیزکیمی بیر دوعانی دا سیزه

بورجلویام.ایلین آخیر گونلری دیر.داخیل سیندیران کیم، بایراملیق

آلان کیم! البته کارمندلری عرض ائدیرم .کارگرلری بایراما اوچ آی

قالاندان اؤتوررلرائشییه!؟خیلاصه! هره بیرجوراهل – عیال یانیندا

شرمنده اولماسین دئیه، یئنه ده دؤولت وئرن بایراملیغی آلماق همان

چیخدی بازارا .بازاردا نه بازار! آزار اوندان یاخشیدی....!

اوشاعیرین شعری یادیما دوشدوکی دئییر:

چال قاوالی، چال کی توی ایامی دیر

سوی بالا سوی ، سوی ها سوی ایامی دیر

الیفی دئدیم کی دالیسیندا اؤزوزسایاسیز.نئچه آی بوندان قاباق

باهالیقا،دولاری ماهانا توتوردولار.او موددان دوشدو، تحریملری

ماهانا قویدولار. بالا-بالا تحریملرده اثرسالماییب ،

انباردارلارلامحتکرلری متهم ائتدیلر.دوزو، من ایشین تاراز

 یئرینی نه گؤره بیلدیم.نه ده بئله سؤزلر منی قانع ائله دی.

هله! هرنه! بایرامدی دا، بایرامین دا شیرینلییی ائله باهالیغیندا،ار-

آروادین داعوا – دؤیوشونده، ائو-ائشییین سیل- سوپورونده و ان

گؤرملی سی جاماعاتین بازارا تؤکولمه سینده دیر.قدیم کیلر دئییل

کی اوشاغی بیر بویاخلی یومورتا یلا آلداداسان . ایندی اوشاقلار

ائله بیل جین دیلر. نه بیرجورابا قانع اولورلار،نه بیرباشماغا.

اونا گؤره دیرکی من نئچه ایللرواربایرامدا اؤزومه بیر زاد آلانمارام.

هه دوسلار! یئنه بیرایل بیلمیرم عؤمروموزه چوخالدی دئییم یا

عؤمروموزدن آزالدی دئییم. اما منیم احوالیمی هر کیمسه کی

سوروشور،دئییرم : شوکر اولسون ، گلن گونلره گؤره یاخشییام.

اونا گؤره ده هامی دئییر: آللاه گلن گونلریزی خیر ائله سین.

یئنی ایلین گلیب چاتماسین ، بایرامی و طبیعتین ده ییشیلمه سینی

بوتون اوخوجولاریمیزا تبریک دئییریک.ساغ قالین ،شاد یاشایین.

 


برچسب‌ها: آللاه گلن گونلریزی خیر ائله سین
نوشته شده توسط محمدرضا شوکتی الوار علیا در دوشنبه بیست و هشتم اسفند 1391 ساعت 0:26 | لینک ثابت |


برچسب‌ها: تبریک عیدنوروز, بایرامینیز موبارک, عیدنوروز
نوشته شده توسط محمدرضا شوکتی الوار علیا در یکشنبه بیست و هفتم اسفند 1391 ساعت 19:10 | لینک ثابت |

تار آغلادی من آغلادیم

جعفری

 

یارین بوینون قوجاقلادیم، یار آغلادی من آغلادیم

ییغیشدی قونشولار بوتون ،جار آغلادی من آغلادیم

باشیندا قارقالان داغا، دانیشدیم آیریلیق سؤزون

بیرآه چكیب باشینداكی، قار آغلادی من آغلادیم

طارم ده نار آغاجلاری، منی گؤروب دانیشدیلار

بؤیومو زیتون اؤخشویوب، نار آغلادی من آغلادیم

ائله كی اسدی بیر خزان، تالاندی گوللریم منیم

خبر چاتینجا بولبوله، خار آغلادی من آغلادیم

دئدیم كی حق منیم كی دیر، باشیمی چكدیلر دارا

طناب كسنده بؤینومو، دار آغلادی من آغلادیم

اوره ك سؤزون دئدیم تارا، سیم لر اؤلدو پارا پارا

یاواش یاواش سیزیلدادی، تار آغلادی من آغلادیم

«جعفری» یم بؤیوم بالا، غم اوره كده قالا قالا

یار جانیمی آلا آلا ،یارآغلادی من آغلادیم

 

 

 

نوشته شده توسط محمدرضا شوکتی الوار علیا در شنبه شانزدهم دی 1391 ساعت 23:31 | لینک ثابت |

         مجنون منم

 ملا محمد فضولي

منده مجنوندان فزون عاشیقليك استعدادی وار

عاشق صادق منم، مجنونون آنجاق آدی وار

نولا قان تؤكمكده ماهر اولسا چشميم مردمي

نطفه ی قابل دورور غمزه ن كيمي اوستادي وار

قيل تفاخر كيم سنين ده وار منيم تك عاشقين

ليلي نين مجنونو، شيرينين اگر فرهادی وار

اهل تمكينم، مني بنزتمه ای گول بولبوله

درده يوخ صبري اونون هر لحظه بير فريادي وار

اؤيله بد حالم كي احواليم گؤرنده شاد اولور

هر كيمين كيم دور جوروندن دل ناشادي وار

گزمه اي كؤنلوم قوشو غافل فضاي عشقده

كيم بو صحرانين گذرگاهيندا چوخ صيادي وار

اي فضولي عشق منعين قيلما ناصحدن قبول

عقل تدبيري دير اول، سانما كي بير بنيادي وار

 

تبریزلی صراف

من ترک شراب لب یار ائیله دیم اولدو

زهر غم هجریله مدار ائیله دیم اولدو

ای شیخ بهشتی دئمه ترک ائیلییه ن اولماز

من ترک سر کوی نگار ائیله دیم اولدو

اؤز جانینی ترک ائیلییه ن اولماز من اؤزومدن

روحوم کیمی جانانی کنار ائیله دیم اولدو

ممکن دگی بیر محنته مین جان دؤزه آمما

من جانیمی مین درده دچار ائیله دیم اولدو

دانسته و فهمیده خط و خاله وورولدوم

من اؤز گونومو تیره و تار ائیله دیم اولدو

هئچ کیمسه اوزون خار و ذلیل ایسته مز آمما

من اؤز اؤزومو دهرده خار ائیله دیم اولدو

عرفان نظربازی و رندی و ظریفی

عالمده خلاصه نه کی وار ائیله دیم اولدو

صرافه دئدیم حکمتیلن یوخ وار اولانماز

گولدو دئدی باخ گؤر یوخو وار ائیله دیم اولدو

 

ممد آراز

بلکه بو یئرلره بیرده گلمه­ دیم

دومان سالامات قال، داغ سالامات قال

دالیمجا سو سپیر یوخسا بولود­لار

لئیسان سالامات قال، یاغ سالامات قال

...

قیی­ویران قارتال­لار یوخ اولدو چنده

نرگیزلر سولوخدو شئهلی چمنده

ای قارا گؤز پری، دالیمجا سن ده

بویلان سالامات قال، باخ سالامات قال

...

گلدیم قارشیلادی گول لر، چیچک­لر

گئدیره­ م ال ائدیر بوز بیچنک­لر

نیدامی چای­لارا دئدی کو لک­لر

بولاخ سالامات قال، آخ سالامات قال

...

داغ­لارین پلنگی شیری ده سن سن

شاعری ده سن سن، شعری ده سن سن

بینی، برکتی، خئیری ده سن سن

چوبان سالامات قال، ساغ سالامات قال



برچسب‌ها: صراف تبریزی, ملا محمدفضولی, ممد آراز, غزل ترکی
نوشته شده توسط محمدرضا شوکتی الوار علیا در شنبه شانزدهم دی 1391 ساعت 23:20 | لینک ثابت |

قیمتلی،قیمتسیز

رحمتلیک رضا ایتگین

بیرتجروبه لی آدام بیر گئجه قیزیل شمعدانداکی شمعین ایشیغیندا اوتوروب اؤز دونیاسیندا سئیر ائدیردی. اؤز-اؤزونه فیکیرلشیرکی، شمعده ن، قیزیل شمعداندان و شوشه ده ن سواللار سوروشسون.اؤنجه شوشه ده ن سوروشور کی: آی شوشه نه اوچون سن بو قده ر عزیزسن؟ سنده ن چوخ- چوخ مواظیب اولورلارکی سینمایاسان؟شوشه جاوابیندا دئییر: منده بیر زاد یوخدور. منیم ایچه ریمله ائشیییم بیردیر، منده حللم- قللملیک یوخدور. صاف ساده یم. هامی نین خوشونا گلیره م. هامیدا منی سئویب منده ن مواظیب اولورلار.سونرا قیزیلدان سوروشدوکی: آی قیزیل سن نه اوچون بئله قیمتلی سن؟اوشاق، بؤیوک هر کیمسه نین الینه دوشورسن، اؤز جانیندان دا آرتیق سنده ن مواظیب اولور. قادینلار سنی اؤزلرینه زینت قرار وئریرلر.قیزیل دئدی: من اوزون ایللر بویو آغیر تورپاقلارین آلتیندا قالیب هر زحمته دؤزموشم، سیناقلاردان اوزو آغ چیخمیشام. اینسانلار منی آغیر زحمتلرله یئر آلتیندان چیخاریب، اودلارلا اریدیب بویئره چاتدیریبلار. من بو قیمتی اؤزوم اؤزومه قازانمیشام. ایندی اودور کی هامی  منی هر زاددان اوستون توتورلار. منی اتله دری آراسیندا اولموش اولسادا ساخلاییرلار. او کیشی سونرا شمعه اوز دوتوب سوروشور: آی شمع ! سن نه یه بئله یانیرسان؟ شمع دئییر: منیم یانماغیم معلومدور. چون اؤز هم جینسیم له دوشمه میشم. منیم یولداشیم منیم جینسیمده دئییل. اودورکی من آخیره قده ر یانمالییام. او کیشی آزجا فیکیرلشیرکی بو دونیادا صاف- ساده اولماق، هر زحمته دؤزمک نه قده ر قیمتلی ایمیش سه، نا جینس له دوشمک او قده ر عذابلی دیر.   


برچسب‌ها: رضا ایتگین
نوشته شده توسط محمدرضا شوکتی الوار علیا در جمعه بیست و چهارم آذر 1391 ساعت 10:50 | لینک ثابت |

قمری دربندی دن بیر نوحه

 

ای دل گؤز آچ اویان کئچیب عؤمر جوان هانی

بئل باغلاما جهانه وفای جهان هانی

هر قرنده دولار، بوشالار، کاروان کئچر

بو کاروانسرایه گلن کاروان هانی

بئش گون قالیب تمام دل آزرده گئتدیلر

بیر باخگیلان او قافله لردن نیشان هانی

چوخ گولشنی خراب ائله دی صرصر خزان

بولبول هانی او گوللر هانی گول ستان هانی

چوخ سرو باش چکیب فلکه باغ عؤمرده

اول باغ عؤور نولدی ، اوسرو روان هانی

توپراق دولوب او باشلارا، اگمزدی چرخه باش

اعضا هانی ، جسدهانی، جیسمیله جان هانی

چوخ نازنین لری چکیب آغوشه مارومور

توپراق ایچینده اونلاری یاده سالان هانی

نولدو زمانه ایچره اولوالعزم انبیا

فیکر ائیله گؤر تمام ملوک کیان هانی

هئچ قویمویوبدی بیرداشی داش اوسته بو فلک

ویرانه اولمویان دئ گؤروم خانمان هانی

چوخ ائولری داغیتدی بو دوران روزگار

آل عبا کیمی قاپیسی باغلانان هانی

چوخ تویلاری جهاندا فلک یاسه دؤنده ریب

قاسم تک اللرینه حنا قان یاخان هانی

چوخ نوعروسی چرخ ائیله ییبدی قرا دوداق

اما دوداغی قان ایله الوان اولان هانی

دامادیلر زمانه ده چوخ نامراد اولوب

اعضاسی خنجرایله سوسوز دوغرانان هانی

داماد کربلاتک الی ده یمه ییب اله

چؤللرده نعشی اوچ گئجه عریان قالان هانی

آل علی مصیبتینی نظمه چکمه یه

هئچ ذی نفسده طاقت شرح و بیان هانی

تاحشر اولونجا هر ائشیده ن ناله سین دئیر

بزم عزاده «قمری» شیرین زبان هانی  


برچسب‌ها: قمری, قمری دربندی, نوحه شعری
نوشته شده توسط محمدرضا شوکتی الوار علیا در شنبه یازدهم آذر 1391 ساعت 22:42 | لینک ثابت |

ای شیعه حسینین یئنه باشلاندی عزاسی

بو غمده تؤکر گؤزیاشی رخساره آناسی


محرم آیین سیزلره تسلیت دئییره م

نوشته شده توسط محمدرضا شوکتی الوار علیا در سه شنبه بیست و سوم آبان 1391 ساعت 22:4 | لینک ثابت |

اوشاق شعری

 

محمدرضا شوکتی

 

فصیللر

 

گؤزه ل قیزام ، گؤزه ل قیز

منیم آدیمدیر اولدوز(قیزلار اوخویاندا)

بیر گؤزه ل اوغلانام من

سئومه لی اینسانام من ( اوغلانلار اوخویاندا)

من سئوه ره م آنامی

اینجیتمه ره م آتامی

معللیمیم وار اولسون

تانری اونا یار اولسون

اؤیره دیر فصیللری

آیلاری هم ایللری

دئییر، اوّل یاز گلر

ساز گلر آواز گلر

بولبوللر گلر باغا

گؤزلریک یاغیش یاغا

یازدان سورا یای گلر

ایستی بیزه پای گلر

یایدا اولار بستنی

 بستنی ایستر منی

پاییز فصلی اینجی دیر

سایسان او اوچونجو دور

خزل ائیلر باغلاری

تؤکر او یارپاقلاری

سونونجو فصلین آدی

دئسم سویوق بوردادی

قیشدا چیخار قار دیزه

سویوق گلر ائویمیزه

آتام قورار بوخاری

اودور ایشین آخاری

ائوه سویوق گلمه سین

منه سویوق ده یمه سین

قیش گئدیب بایرام گلر

چؤلده قویونلار ملر

اوشاق ، بؤیوک بیربه بیر

بایرامی تبریک دئییر   

بایرام گلر یاز گلر

ساز گلر آواز گلر

بولبوللر گلر باغا

گؤزله ریک یاغیش یاغا

------------------------------------------------------

کپنک

محمد رضا شوکتی الوارعلیا

 

کپنکم کپه نک

گل بو شعری اؤیره نک

گوللو قانادلاریم  وار

خاللی یانا قلاریم وار

گول اوستونه قونارام

گولون عطرین آلارام

قارانلیغی سئومه ره م

اونا کؤنول وئرمه ره م

شمعی چوخ سئوه ره م من

هامییا دئیه ره م من:

دونیامیز آیدین اولسون

قلبیمیز نورلا دولسون

جان وئره ک آزادلیغا

ایشله یک آبادلیغا

 

دنیز- بالیق

 

محمدرضا شوکتی

 

اوره ییم دنیزلرین

ساحیلینده سئیر ائدیر

دانیشیر دالغالارلا

اوچوب گؤیلره گئدیر

دنیز چوخ مهرباندیر

گؤزه ل ناغیللار دئییر

ساحیلین بولودلاری

ناغیل لاردا سئیر ائدیر

بیر سینیق قاییق ایله

بابام گئدیب دنیزه

آنام دئییر گئدیب دیر

بالیق گتیرسین بیزه


برچسب‌ها: اوشاق شعری, ادبیات کودکان, فصل, پروانه, کپنک, دنیز, دریا وماهی
نوشته شده توسط محمدرضا شوکتی الوار علیا در جمعه دوازدهم آبان 1391 ساعت 19:37 | لینک ثابت |

قاراداغ زلزله سی حاققیندا

حسن بخشی

 

قاراداغ اؤلکه سینی زلزله ویران ائله دی

دوشدو میللت خطره هاممینی حئیران ائله دی

ایرانین میللتی نین غیرتی طغیانه گلیب

اؤز شهامتلرینی عالمه اعلان ائله دی

ورزقان تیتره دی کندلر اوچولوب اولدو خراب

چوخلارین آلدی جانین قانینا غلطان ائله دی

قالدی توپراقلارین آلتیندا اوشاق، پیروجوان

هریسین دؤورو برین خاک ایله یکسان ائله دی

آتالار ائتدی روان اوزلرینه گؤزیاشینی

آنالار یولدو ساچین اوز گؤزونو قان ائله دی

تبریزین غم کدری آرتدی چکیب ناله و آه

غصه دن سینه سینی چاک گریبان ائله دی

باشین اگدی آشاغا آغلادی اول شانلی سهند

سبلان داده گلیب ناله و افغان ائله دی

پوللو یومما گؤزونو گل قاباغا خرجله پولون

قوی دئسینلر پولونو خیر ایشه احسان ائله دی

آللاهی یاد ائله یین آللاها خاطیر چالیشین

آللاهی یاد ائله ین موشکولون آسان ائله دی

گر علی شیعه سی سن طی ائله مولا یولونو

چون علی غمزده لر دردینه درمان ائله دی

ملت ایران اولوبدور بو غم و درده شریک

گؤزیاشی ورزقانین مولکونو عمان ائله دی

«بخشی» ده گزدی تامام کندلری گؤردو بیر بیر

آغلادی سیزلادی غصه اوره یین قان ائله دی

تبریز شهریور91

مبایل 09358276709

نوشته شده توسط محمدرضا شوکتی الوار علیا در چهارشنبه پانزدهم شهریور 1391 ساعت 0:31 | لینک ثابت |

تسلیت

آذربایجان سنین باشین ساغ اولسون


قیزیل توپراق قاراداغین داغلاری 

داغ چکدیلر سینه لرین اوستونه

یئنه سارا اؤزون ویردی سئللره

کؤلگه سالیب غم اهرین اؤستونه

 قان آغلاییر، قان آغلاییر ورزقان

ماتم گلیب لاپ شهرین اوستونه

یاسا باتیب هریس مصیبتده دیر

غصه گلیب غم قهرین اوستونه

آذربایجان سنین باشین ساغ اولسون

اومودلویام شن سحرین اوستونه


یاشاسین خالقیمیز


آرتیق حؤمتله : محمدرضا شوکتی (الوارلی رضا)


برچسب‌ها: زلزله قره داغ, تسلیت, شعر ترکی در مورد زلزله اهر وورزقان
نوشته شده توسط محمدرضا شوکتی الوار علیا در چهارشنبه بیست و پنجم مرداد 1391 ساعت 1:37 | لینک ثابت |

خزر ساحیلینده

 

محمد رضا شوکتی الوارعلیا

 

آغلا دنیز ، آغلا دنیز

اورمو گؤلو یاریمجاندیر

اوره ییمیز بوتون قاندیر

دوز دولوبدور گؤزلرینه

باخان یوخدور سؤزلرینه

اؤلومونه یاس دوتور او

داها گؤزلرده ن ایتیر او

 

آغلا دنیز ، آغلا خزر

نامردلرده ن حذر- حذر

زمانه ده ن آمان - آمان

اوره ییم دولودور یامان

یامان توتولموشام  اینان

سحردی گون چیخان زمان

شافاقلاییر خزر گؤیو

شاققیلداییر خزر سویو

نوحه دئییر سانکی دیلی

اؤلوب بیزیم اورمو گؤلو

 

های سالیرام ، آغلاییرام

باشا قارا باغلاییرام

سنده منله آغلا دنیز

آغلا دنیز ، چاغلا دنیز


برچسب‌ها: خزر و دریاچه اورمیه
نوشته شده توسط محمدرضا شوکتی الوار علیا در دوشنبه بیست و نهم خرداد 1391 ساعت 14:6 | لینک ثابت |

آنا گونو بوتون آنالارا موبارک اولسون

نوشته شده توسط محمدرضا شوکتی الوار علیا در چهارشنبه بیستم اردیبهشت 1391 ساعت 2:16 | لینک ثابت |
ایشیق

محمد رضا شوکتی

سحر آچدیقدا آنام،

گئجه نین زیل قاراسین،

ائویمیزده ن سوپورور.

گونشین آخار نورون

او گؤزه ل اللر ایله ،

گؤتورور،هئی گؤتورور

بیلیره م پنجره میز ،

زامان اؤتدوکجه ،

 قارانلیقلارا

حسرت قالاجاق!


---------------------------------------------------------------

آنام

میر مهدی اعتماد


نقل ائده رلر کی منی دوغدو آنام

دئدی : به به نه گؤزه لدیر بو بالام

دولانیب باشیما پروانه کیمی

چکیب آغوشونا ، دردانه کیمی

سود ایله قووه وئریبدیر اتیمه

دؤزوب ایللر بویو چوخ زحمتیمه

دئییب آهنگله لای- لای سؤزونو

یومماییب چوخ گئجه اصلا گؤزونو

آغلایان واختدا چکیبدیر یانینا

سؤیله ییب آغلاما قوربان جانینا

اؤیره دیب حؤرمت ایله یولداشینا

مهربان اول باجینا ، قارداشینا



برچسب‌ها: شعر ترکی در مورد مادر
نوشته شده توسط محمدرضا شوکتی الوار علیا در سه شنبه نوزدهم اردیبهشت 1391 ساعت 10:50 | لینک ثابت |

بایرام سوفره سی

علی فرهاد

«هفت سین» دئدیییمیز بایرام سوفره سی بیر تاپماجا کیمی اولوب. آخی نئجه اولا بیلر یئددی دنه «س» حرفیله باشلایانلار سوفره یه قویولا. سوال لار بونلاردیر ندن «س» ایله باشلایانلار و نده ن سوفره ده «س» ایله باشلامایانلاری دا قویوروق؟ نییه بو سوال لارین چوخونا عاغلیمیزا باتان آنلام یوخدور!! دوزدور هره سینه بیر جور دلیل دوزلدیبلر، آما گؤرک بونلارین دوزو نه اولا بیلر. بو سوفره یه نه لر دوزمه لی ییک. هره سینین آنلامی ندیر؟ میثال اوچون سیرکه نه اوچون لازیم دیر؟ تکجه «س» ایله باشلاندیغینا گؤه می؟

سیز بو تورکجه جمله نی نظره آلین: «یئددی سین سوفره یه قوی» بیلدییینیز کیمی سین تورکجه ده بیر پسوند دیر آما فارسجادا بیر حرفین آدی دیر. ایندی نه راحت «یئددی سین» بیر یانلیش چئویرمه ایله «هفت سین» اولا بیلر. سونرا دا ایللر بویو نده ن «س» یا «سین» اولدوغون آختاریب هئچ دوز عمللی دلیل ده تاپابیلمیریک.

حتمن «س» حرفیله باشلاماغا بو سوفره ده اولانلارین دلیلی یوخدور. اونوتمایاق کی بیزه قدیمدن یئتیشن هر بیر رسمین تاریخی و ان آزیندان اسطوروی آنلاملاری واردیر و بو آنلاملارین اؤنمینی باشا دوشمک لازیمدیر.

اوسطوره لریمیزه گؤره بو سوفره یه یئددی برکتی  قویمالی ییق. دئمک اولار قدیمکیلر دئمیشلر؛ «برکتلردن یئددی سین سوفره یه قوی» (هفت سین یوخ!) و بئله لیکله بونلاری اورتایا قویماق لا اؤزموزو اونلاردان فایدالی حیس ائدیریک. بو یئددی برکت، گؤی برکتی، حئیوان برکتی، آل- وئر برکتی، گؤیرمک برکتی دیر. ایل تحویلیندن سونرا بو برکت لر عایله آراسیندا بؤلونر. اونلاری یئمک و ساخلاماقلا بیز بو برکتلری ایلین باشیناجا اؤزوموزله داشییاریق.

دئمه لییک بو یازیدا حؤرمتلی آراشدیرجی « ناصر منظوری» جنابلارینین بو قونودا یازدیقلاریندان فایدالانمیشیق و بو سوفره ایسه کئچن ایل بایرامیندا دؤشمنیشدی.

- آینا ایله قرآن گؤی برکتی دیلر. «قرآن» آسمانی کیتاب دئییرک و اونون گؤیدن و آللاه طرفیندن بیزه نازیل اولماسین بیر برکت کیمی ساییریق. آینادا آیدینلیق نیشانه سی و آی کلمه سیندن آلیندیغی اوچون گؤی برکتی ساییلیر.

- سو و بالیق ایکی سی ده سو برکتی دیلر. سو اؤزو بؤیوک نعمت اولدوغونا گؤره و بالیق سودان آلینان برکت کیمی قوتلانیر. بالیق  دا قیرمیزی رنگ ده مبارک اولماق نیشانه سی دیر.

- بو سوفره ده بئله بیر زاد یوخ آما بیر شیرینی نین ده اولماسی سوفره یه شیرینلیک وئره ر. ایللاه کی اؤز یاشادیغیز یئریزین سوقاتی اولا. تبریزین ده سوقاتلاری نین بیری «لؤووز» دور.

- سیککه آل- وئر برکتی دیر. قدیم چاغلاردان سیککه بیر آلیش – وئریش و مال- دؤولت نیشانه سی کیمی ایشله نیب. بو سیککه لرین بیرین برکت اوچون ایل بویو یانیزدا دولاندرمانیزین هئچ ضرری یوخ.

- یومورتا ان چوخ ایشله نن حیئوان برکتلرینده ن دیر کی سوفره نی گؤزه ل له ده بیلر. اونو بویاماق اولار. بویوماق اوچون تامام رنگ لرده ن و هر وسیله نی ایشلتمک اولار. اسکی چاغلاردان سوغان قابیغی، گیرده کان قابیغی و گؤی- گؤیرنتی لردن اله گلنلردن بویاناردی. ایندیسه شمعی میداد، سو رنگی و هر ندن کی الیزده اولسا فایدالانا بیلرسیز.

- سبزه گؤیه رتمک، گؤیرمک برکتینه گؤره اولور. گؤیرمک، نسلین آرتماسی و دوغماق نیشانه لریندن بیری دیر.

- «آلما» ایله «ایده» آغاج برکتی دیر. دئدیییمیزه گؤره قیرمیزی اولدوقلاری اونلارین مبارک اولدوغون دا گؤستریر. بونلارین ایکیسین یوخسا بیرین قویماق اولار.

- بوغدا اسکی چاغلاردان بری یئردن اله گلن برکت و آداملارین ان واجیب یئمک لریندن اولوب. اوندان اله گلن هر بیر شئی ده بو برکت دن اؤرنک اولا بیلر. اونلارین اَن خالیص لری قووورغا و سومنی (سمنو) اولا بیلر.


برچسب‌ها: سفره هفت سین
نوشته شده توسط محمدرضا شوکتی الوار علیا در دوشنبه بیست و نهم اسفند 1390 ساعت 17:21 | لینک ثابت |
موشتولوق وئردی سحر یئللری دور یاز گلیر

آچ کؤنـول شعـر و غزه‌ل دفتـرینــی یاز گلیر

نوشته شده توسط محمدرضا شوکتی الوار علیا در شنبه بیست و هفتم اسفند 1390 ساعت 13:24 | لینک ثابت |

آذربایجان خالق ماهنیسی

ساری بولبول

وطن باغی آل- الواندیر

یوخ اوستونده خاری بولبول

عؤمور سورمه لی دؤوراندیر،

سسین گلسین، ساری بولبول

***

گئییب یاشیل دونون چؤللر،

هوه سینده آچیب گوللر

تؤکوب شیرین- شیرین دیللر

گل اویالداق یاری بولبول

***

بولبول سنین ایشین قاندی،

عاشیقلار اودونا یاندی!

نه دن هر یئرین الواندی

کؤکسون آلتی ساری بولبول

***

اوخو قوشلار دیله گلسین

خوش نفسین زیله گلسین!

یاریم گوله- گوله گلسین،

من چالاندا سازی بولبول

 

نوشته شده توسط محمدرضا شوکتی الوار علیا در سه شنبه بیست و سوم اسفند 1390 ساعت 13:7 | لینک ثابت |

«گلین لر بزه یی» کیتابیندان

سید مهدی اعتماد«ناطقی»

(1360-1277)

قانون قویوب بوردا بیزه شرع مطهر

اوغلان قیزی آلماقدا گره کدیر اولا ابصر

یعنی: قیزی جاییزدیر اؤزو ائیله یه رؤیت

بئش گون سورادان چکمه یه بیر بوللو مصیبت

اوغلان کی قیزی گؤرمه دی چیرکیندی گؤزه لدیر

تویدان سورا آچدی باشینی گؤردو کئچلدیر

ویرسین باشینا، سؤیله سین :«ای وای جانیم ای وای»

هئچ گؤرمه میشم من بو صیفتده خانیم ای وای!

واجیبدی بئش آلتی دوجون، هر گونده دؤیوشسون

ویر- سیندیر اگر اولماسا لازیمدی ده ییشسین

یا مخفی شبانه ائله سین ترک ولایت

کندیستانا قاچسین ائله سین جانینی راحت

نوشته شده توسط محمدرضا شوکتی الوار علیا در دوشنبه هشتم اسفند 1390 ساعت 16:55 | لینک ثابت |
 غزل منبع:قارلي ساوالان(شعر:علی آغا واحدین دیر)
شراب اولا، من اولام، بیرده نازلی دلبر اولا
بیر اوزگه عالمی واردیر، اگر میسر اولا
صفای مجلس مئی مین، بهشتده ن آرتیقدیر
بیر الده گول توتا جانان، بیر الده ساغر اولا
اولاندا مست، آچا زولفون نگار، نشئه سی وار
عمومه ذوق وئره بزم مئی معطر اولا
بساط باده ده حال اهلینین فداسی، اولوم
شرابی قال ایله ایچمه، اگر پیمبر اولا
اسیر زولفونم، ای شوخ، گل آجیقلانما
اسیره حورمت ائدرلر، اگرچی کافر اولا
نه لیلی سن کیمی اولموش، نه من کیمی مجنون
نه کاره دیر گلیپ اونلار بیزه برابر اولا
گوره‌نده، «واحد»اوزون یاریمین اسیر کونلوم
نه نوع ساکت اولار؛ اود اولا، سمندر اولا
نوشته شده توسط محمدرضا شوکتی الوار علیا در شنبه ششم اسفند 1390 ساعت 0:12 | لینک ثابت |

هه آیلیغیم آرتدی

اوستاد حسین شهرک

 

سؤز دوشدو کی آیلیقچیلارین آیلیغی آرتدی!

باققال باهالاتدی                                                         هه آیلیغیم آرتدی!

فیرلاتدی حامامچی فیته نی، قاش گؤزون آرتدی!

سو آب حیاتدس    نیرخین تازالاتدی                              هه آیلیغیم آرتدی!

قیزلار بوی آتیب،یوخدو جهیز ائلچی قاییتدی!

آرواد بئکار،اوغلان بئکار،ائوده یاتایاتدی                          هه آیلیغیم آرتدی!

آرتیردی اجاره بهانی، صاحب خانه، ائو اولدو وئرانه

قد اولدو کمان، گونده مخارج چاتا- چاتدی                      هه آیلیغیم آرتدی!

ات- مت باها اولدوقدابالام، سوت باهالاندی،جوت- جوت باهالاندی

دؤلت ده ضرر ائیله دی «سوبسیدی» آزالتدی               هه آیلیغیم آرتدی!

دؤکتورکی ائدیب بیمه ایله عقد قرارداد،قالسین هله آزاد

نق ویرماغی قالسین یئنه ده نیرخی چوخالتدی             هه آیلیغیم آرتدی!

سلمانی دوتوب قایچینی، چیق-چیقدی بفرما!   ایشده چنه ویرما!

بزاز ده ییشیب نیرخینی، آرشینی قیساتدی                  هه آیلیغیم آرتدی!

کئچ یاغ دویوده ن  گؤی ده دی آزاد دئیه قند-چای، انبارده تای- تای  

سایسیز گلیرین اولسا ایش البته راحاتدی                      هه آیلیغیم آرتدی!

آیلیق یاریسی مالیاتا، بیمه یه گئتدی

ییرتیق یاماغا آی نه بیلیم ایینه یه گئتدی

اقساط آپاریب، بیریاریسیندان دا قوپارتدی                      هه آیلیغیم آرتدی!                  

نوشته شده توسط محمدرضا شوکتی الوار علیا در جمعه بیست و هشتم بهمن 1390 ساعت 12:44 | لینک ثابت |

پول بیر عجیبه شئیدیر!

رحمتلیک آرش آزاد

جیب بوش، قوناق گلیبدیر اون بئش نفر ناهارا

«دردا که راز پنهان خواهد شد آشکارا»

لیقوان پنیری، بیرده خوی یاغینی گؤره نده

«دل میرود ز دستم صاحبدلان! خدا را!»

دوست- آشنادان اوچ آیدیر، گیزلنمیشم گل ، ای پول

«باشد که باز بینم دیدار آشنا را»

تیرلنمیشم آجیمدان، آرواد دئییر: پیانسان

«هات الصبوح هبوا یا ایهاالسکارا»

بیر حاله قالمیشیق کی، بیر چؤمچه یاغ، بیرآز قند

«اشهی لنا و احلی قبلة العذارا»

قوربانینام رییس جان ! گل بیر یاغ ائیله اعلان

«روزی تفقدی کن درویش بی نوا را»

علمی بوراخ بیر آزجا سیرتیق لیق اؤیره ن، اوغلوم

«کاین کیمیای هستی قارون کند گدا را»

آت رادیونو کناره آل بیر خبرچی آرواد

«تا بر تو عرضه دارد احوال ملک دارا»

باشماق تایی الینده، جلادکیمی دایانمیش

«دلبر که در کف او، موم است سنگ خارا»

بئش گون ریاستینده، اینجیتمه خلقی دوستوم

«نیکی به جای یاران فرصت شمار یارا»

چون یوخ قولومدا قوت، قورخومدان ائله ره م من

«با دوستان مروت با دشمنان مدارا »

پول بیر عجیبه شئیدیر، بیر آزجا اولسا جیبده

«در رقص وحالت آرد صوفی پارسا را»

بیر یاغ ساتیرلار ایندی، آغ توکلری قارالدیر

«ساقی! بشارتی ده پیران با صفا را»

ات- یاغ کی یوخدور ائوده، دادسیز اولور غذامیز

«گر تو نمی پسندی تغییر ده قضا را»

حافظ ! منی باغیشلا، گر دوز سوز اولدو شعریم

«ای شیخ پاکدامن معذور دار ما را»

نوشته شده توسط محمدرضا شوکتی الوار علیا در جمعه بیست و هشتم بهمن 1390 ساعت 12:35 | لینک ثابت |
 
Powered By Blogfa - Designing & Supporting Tools By WebGozar